बंगलादेशको ५५औँ स्वतन्त्रता दिवसको अवसरमा काठमाडौंमा भव्य स्वागत समारोह
काठमाडौँ । बंगलादेश दूतावास काठमाडौं ले काठमाडौँमा बंगलादेशको ५५औँ स्वतन्त्रता तथा राष्ट्रिय दिवसको अवसरमा भव्य स्वागत समारोह आयोजना गरेको छ।
काठमाडौँस्थित Radisson Hotel Kathmandu मा आयोजित उक्त समारोहमा नेपालका उपराष्ट्रपति रामसहाय प्रसाद यादव प्रमुख अतिथिका रूपमा सहभागी भएका थिए। कार्यक्रममा नेपालस्थित विभिन्न देशका राजदूत तथा कूटनीतिक नियोगका प्रमुख, मन्त्री, राजनीतिक दलका नेताहरू, उच्च सरकारी अधिकारी, नागरिक समाजका प्रतिनिधि, व्यवसायी, सञ्चारकर्मी तथा नेपालमा बसोबास गर्ने बंगलादेशी समुदायको उल्लेख्य उपस्थिति रहेको थियो।
कार्यक्रममा बोल्दै नेपालका लागि बंगलादेशका राजदूत एमडी शफिकुर रहमान ले बंगलादेशको मुक्ति संग्रामका शहीदहरूप्रति श्रद्धाञ्जली अर्पण गरे। उनले उक्त युद्धका क्रममा नेपाल सरकार र नेपाली जनताले दिएको नैतिक तथा भौतिक सहयोगप्रति आभार व्यक्त गरे।
राजदूत रहमानले नेपालसँगको द्विपक्षीय सम्बन्धलाई व्यापार, लगानी, ऊर्जा, पर्यटन, शिक्षा, संस्कृति तथा जनस्तरको सम्बन्धजस्ता क्षेत्रमा थप सुदृढ बनाउने प्रतिबद्धता समेत व्यक्त गरे। साथै उनले बालेन्द्र शाह नेतृत्वमा गठन भएको नयाँ सरकारलाई बधाई दिँदै दुई देशबीचको सहकार्य अझ विस्तार हुने विश्वास व्यक्त गरे।
समारोहका क्रममा संयुक्त राष्ट्रसंघ महासभाको ८१औँ अधिवेशन (२०२७–२०२८) का लागि अध्यक्ष पदमा उम्मेदवारी दिएका डा. खालिलुर रहमान को समर्थनका लागि प्रचार सामग्री पनि प्रस्तुत गरिएको थियो।
कार्यक्रममा उपराष्ट्रपति यादव र राजदूत रहमानले संयुक्त रूपमा केक काट्दै मित्र राष्ट्रबीचको सम्बन्ध झल्काउने प्रतीकात्मक टोस्ट आदानप्रदान गरेका थिए। त्यस अवसरमा द्विपक्षीय चासोका विषयमा समेत छलफल भएको जनाइएको छ।
करिब ३८० जनाको सहभागिता रहेको उक्त कार्यक्रममा नेपालका कानुन, न्याय तथा संसदीय मामिला मन्त्रीसहित २५ भन्दा बढी कूटनीतिक नियोगका प्रमुख तथा कूटनीतिक समुदायका सदस्यहरूको उपस्थिति रहेको थियो। समारोह अन्त्यमा बंगलादेशी तथा अन्तर्राष्ट्रिय परिकारसहितको रात्रिभोजको व्यवस्था गरिएको थियो।
क्याटेगोरी : प्रमुख समाचार
प्रतिक्रिया