विज्ञहरूको निष्कर्ष: चीनको मोडलबाट नेपालमा गरिबी घटाउन सकिन्छ

काठमाडौं । चीनका राष्ट्रपति सि जिनपिङले अघि सारेको गरिबी निवारणसम्बन्धी अवधारणा नेपालका लागि पनि उपयोगी हुनसक्ने विज्ञहरूले बताएका छन्। फ्रेन्ड्स अन क्लाउडले काठमाडौंमा आयोजना गरेको “गरिबी निवारणमा सि जिनपिङको सोच” विषयक अन्तरक्रिया कार्यक्रममा विभिन्न क्षेत्रका विज्ञहरूले यस्तो धारणा राखेका हुन्।

कार्यक्रममा डा. अग्नि काफ्लेले गरिबी घटाउन सीपमूलक तथा व्यवसायिक शिक्षामा जोड दिनुपर्ने बताए। चीनले आधुनिक शिक्षासँगै प्राविधिक र व्यवसायिक शिक्षालाई प्राथमिकता दिँदै आर्थिक प्रगति हासिल गरेको उदाहरण प्रस्तुत गर्दै उनले नेपालले पनि त्यही दिशा समात्नुपर्ने बताए। यस्तो शिक्षाले दक्ष जनशक्ति उत्पादन हुने र विदेशमा रोजगारीका अवसर बढेर रेमिट्यान्ससमेत वृद्धि हुनसक्ने उनको भनाइ थियो।

अर्थशास्त्री तथा जनसंख्याविद् डा. कुशुम शाक्यले सि जिनपिङले अघि सारेको १० बुँदे मार्गचित्रबारे चर्चा गर्दै पूर्वाधार र यातायात विकासलाई विशेष प्राथमिकता दिनुपर्ने बताइन्। उनका अनुसार बलियो पूर्वाधार र यातायात प्रणालीबिना उत्पादन वृद्धि, बजारसम्म पहुँच र प्राकृतिक स्रोतको प्रभावकारी उपयोग सम्भव हुँदैन। साथै गरिबी निवारणमा स्थानीय सरकारको भूमिका महत्वपूर्ण हुने भएकाले त्यसलाई अझ प्रभावकारी बनाउनुपर्ने उनले जोड दिइन्।

कार्यक्रममा जापानका लागि नेपालका पूर्व राजदूत डा. विष्णुहरि नेपाल, इतिहासविद् डा. गोविन्दमानसिंह कार्की तथा संस्थाका अध्यक्ष शोभित उप्रेतीले नेपालको अस्थिर राजनीति, भ्रष्टाचार, युवाहरूको विदेश पलायन, बेरोजगारी र उद्योग–व्यवसायमा देखिएको निराशा जस्ता समस्यालाई समाधान गर्दै चीनको अनुभवबाट सिकेर गरिबी निवारणतर्फ अघि बढ्न सकिने धारणा व्यक्त गरेका थिए।